“НООС, НООЛУУР АРЬС ШИРЭН БҮТЭЭГДЭХҮҮН-2021” ҮЗЭСГЭЛЭН ХУДАЛДАА
ХХААХҮЯам, Монголын арьс ширний үйлдвэрлэлийн холбоо, Монголын ноос ноолуурын холбооны санаачилгаар “Ноос ноолуур, арьс ширэн бүтээгдэхүүн-2021” арга хэмжээ 15 дахь жилдээ 2021 оны 10 дугаар сарын 21-25-ны өдрүүдэд “Мишээл экспо” төвд зохион байгуулж байна. Энэхүү үзэсгэлэн худалдаанд ноос ноолуур, арьс ширэн бүтээгдэхүүн үйлдвэрлэгч 100 гаруй ААН оролцож байна.
Үзэсгэлэнгийн нээлтийн арга хэмжээнд УИХ-ын Дарга Г.Занданшатар оролцож, нээлтийн үгэндээ “Импортыг орлох, экспортын чиг баримжаатай үйлдвэрлэлийг хөгжүүлэхийн тулд малын гаралтай түүхий эд болох арьс шир, ноос ноолуурын боловсруулах үйлдвэрүүдэд түлхүү анхаарч, дэмжлэг үзүүлэх шаардлагатай. Эдгээр нь дуусдаггүй харин ч ургадаг төлждөг баялаг учир борлуулж, нэмүү өртөг шингээж гаргаж чадвал бүрэн хөгжих боломжтой. Мөн гадаад зах зээлийг тэлж чадвал ноос ноолуурын салбар ядуурлыг бууруулахад 50,000 ажлын байр шинээр гаргаж цаашид экспортод 1 тэрбум долларын борлуулалтын орлого оруулах боломжтой гэж харж байна.” гэдгийг дурьдлаа.
Үзэсгэлэн энэ сарын 25-нд дуусах бөгөөд салбарын шилдэгүүдийг шалгаруулж, шагнал гардуулах юм.
