НООС, НООЛУУРЫН САЛБАРЫН ХҮНИЙ НӨӨЦИЙН АСУУДЛААР ХЭЛЭЛЦҮҮЛЭГ ХИЙЛЭЭ.
Монголын ноос ноолуурын холбоо, Хүний хөгжлийн сургалт, судалгааны төвтэй хамтран ноос, ноолуурын салбарын Говь, Кашмир Холдинг, Буян Кашмир, Ханбогд Кашмир, Эрдэнэт ноолуур, Сноу Филдс, Өгөөж Шим, Нанс Кашмир, Нэгүн Кашмир, Лидер Кашмир, Гоёл Кашмир, Монгол Нэхмэл, Говь-Эрдэнэ Кашмир, Хатант Интернэйшнл, Гурван сор, Бэби Кашмир зэрэг үйлдвэрүүдийн хүний нөөцийн ажилтнуудыг оролцуулсан хэлэлцүүлгийг зохион байгуулав.
Хэлэлцүүлгээр салбарын өмнө тулгарч буй хүний нөөцийн хомсдол, залгамж халаа, хөдөлмөрт бэлтгэх сэтгэл зүйг бий болгох, ажилчдын хариуцлагын тогтолцооны асуудлуудыг ярилцлаа.
Мөн хөдөлмөрийн харилцаанд гарч байгаа хүндрэл, эрсдэлтэй асуудлыг төр, засгийн бодлогод тусгуулах, ноолуурын салбарт ажиллагсадын мэргэжлийн нэршлийг хортой, хүнд хэвийн бус нөхцөлд оруулах, ур чадвартай боловсон хүчнийг тогтоон барих, чадамжинд суурилсан сургалтууд зохион байгуулах, ноолуурын салбарт ажиллах сэдлийг төрүүлэхүйц видео контент, кино, сурталчилгаа хийх, салбарын мэргэжлийн мэргэжлийн инженер, техникийн ажилтнуудыг бэлтгэхэд реформ хийх шаардлагатай байгаа зэрэг олон чухал асуудлыг хөндөв.
Хэлэлцүүлэгт оролцогчид салбарын хүний нөөцийн асуудлаар ажлын хэсэг байгуулахаар болж, ойрын хугацаанд үндэсний хэлэлцүүлэгт бэлтгэх, төр засгийн холбогдох байгууллагуудтай хамтарч ажиллахаар тогтлоо.
