КЕТТЕЛИЙН ЧАДАМЖИЙН СУРГАЛТЫН АНХНЫ ТӨГСӨГЧИД МЭРГЭЖЛИЙН ҮНЭМЛЭХЭЭ ГАРДАН АВЛАА
Ноос ноолуурын салбарт тулгамдаж буй хүний нөөцийн асуудлыг шийдвэрлэх асуудлын хүрээнд Монголын Ноос Ноолуурын Холбоо, БЗД-ийн Хөдөлмөр, халамж үйлчилгээний хэлтэстэй хамтран сүлжмэл бүтээгдэхүүний холбон оёгч буюу кеттельчиний богино хугацааны сургалтанд дөрвөн хүнийг хамруулснаас Б.Эрдэнэзаяа, Э.Шинэбаяр нар сургалтаа амжилттай дүүргэж 3 дугаар зэргийн мэргэжлийн үнэмлэх, чадамжийн гэрчилгээгээ гардан авлаа.
Онол, практик хосолсон тус сургалтыг Монгол-Солонгосын Политехникийн коллежийн кеттелийн багш Ч.Цолмон МННХ-ны дэргэдэх Текстилийн технологийн төвийн Италийн Complett машин дээр хийж, шаардлагатай суурь мэдлэгийг олгон чадавхижуулсан юм.
Монголын ноос ноолуурын салбарт эрэлттэй байгаа мэргэжил болох сүлжигч, кеттельчнийг бодлогоор дэмжин тасралтгүй бэлтгэх нь салбарын хүний нөөцийн тулгамдаж буй асуудалд хувь нэмрээ оруулаад зогсохгүй хөдөлмөрийн зах зээлийн эрэлт, нийлүүлэлтийг тэнцвэржүүлэхэд үнэтэй хувь нэмэр оруулж байгаад тус сургалтын ач холбогдол оршино.
