ИТГЭМЖЛЭГДСЭН ЛАБОРАТОРИУД БОЛОН ҮЙЛДВЭРИЙН ДОТООД ХЯНАЛТЫН ЛАБОРАТОРИУДАД УР ЧАДВАРЫН СОРИЛТ ХИЙНЭ
Ноос ноолуурын холбооноос MNS ISO/IEC 17025:2018 итгэмжлэгдсэн лабораторитой болон үйлдвэрийн дотоод хяналтын лабораторитой байгууллагуудад “Сорилтын болон калибровкийн лабораторид тавигдах ерөнхий шаардлага MNS ISO/IEC 17025:2018 стандарт”-ын дагуу самнасан ноолуурын сорилт шинжилгээний чанар, хэмжлийн нэгдмэл байдлыг хангуулах зорилгоор “Ур чадварын сорилт”-ыг үнэлэх хөтөлбөрийг Монголын ноос ноолуурын холбооны итгэмжлэгдсэн баталгаажуулалтын байгууллага нь дотооддоо анх удаа зохион байгуулах гэж байна.
Энэхүү ур чадварын сорилд Гаалийн төв лаборатори, Говь, Кашмир Холдинг, Ханбогд Кашмир, Сор Кашмир, Буян Кашмир, Өгөөж Шим, Блю Скай Кашмир, Гоёл Кашмир, Мон Итали Кашмир, Баялаг Өлзий, Нанс Кашмир. Хатант Интернэйшнл компаниуд оролцоно.
Ур чадварын сорилыг үндэсний хэмжээнд хийснээр дотоод хяналтын лабораторитой компаниуд MNS ISO/IEC 17025:2018 стандартын итгэмжлэлийг авах, итгэмжлэгдсэн лабораториудыг олон улсад хүлээн зөвшөөрүүлэхэд чухал үзүүлэлтийн нэг болох юм.
Ур чадварын сорил нь бүтээгдэхүүний чанарыг сайжруулах, шинжээчийн ур чадварыг дээшлүүлэх, шинжилгээний арга, аргачлалыг нэгтгэх хянах, тухайн лабораторид үл тохирлоо залруулах, сэргийлэх, сайжруулалт хийх боломжийг бүрдүүлж хэрэглэгчийн итгэх итгэлийг нэмэгдүүлэх чухал ач холбогдолтой.
