ТАРИФЫН ХЭЛЭЛЦЭЭРИЙН ҮР ДҮН, АЧ ХОЛБОГДЛЫГ ТАНИЛЦУУЛАХ УУЛЗАЛТЫГ ХИЙЛЭЭ
Монголын Ноос Ноолуурын Холбоо, Германы Фридрик Эбертийн сан, Монголын хөнгөн үйлдвэрийн ажилтны ҮЭ-ийн холбоо хамтран ноолуурын салбарт нийгмийн түншлэл тарифын гэрээний анхдагч жишиг загварыг бий болгохоор 2023 оны 5 сараас ажлын хэсэг байгуулан ажиллаж байна.
Энэ хугацаанд салбарын үйлдвэрүүдийн 150 гаруй ажлын байрны ажил мэргэжлийн тодорхойлолт, ур чадвар дээр үндэслэн тарифт цалин хөлсний систем нэвтрүүлэх төслийг амжилттай хийж гүйцэтгээд байна.
Ажлын хэсгээс “Нийгмийн түншлэл ба тарифын хэлэлцээр” байгуулах хэрэгцээ шаардлага, үр дүн, ач холбогдолыг таниулах уулзалтыг Говь, Кашмир Холдинг, Ханбогд кашмир, Блю Скай Кашмир, Гоёл кашмир компаниудын удирдлагууд болон холбогдох ажилтнуудад танилцуулав.
Тарифын хэлэлцээрийг салбарт байгуулсанаар ажилтны ур чадвар, мэргэшлийн зэрэг түвшинтэй уялдуулсан хөдөлмөрийн үнэлэмжийг тогтоох, хүний эрхийг дээдэлсэн тогтвортой үйлдвэрлэлийг бий болгох, хөдөлмөрийн сахилга батыг дээшлүүлэх, нэг үйлдвэрээс нөгөөд шилжих хөдөлгөөнийг хязгаарлах цалин хөлсний оновчтой нэгдсэн системийг бий болгож Монгол ноолуурыг дэлхийн зах зээлд сурталчлахад эерэг өөрчлөлтүүдийг авчирах юм.
