Гадаад харилцааны сайд Д.Цогтбаатар Бүгд Найрамдах Итали улсаас Монгол улсад суугаа Элчин сайд Андрэа Дэ Филиппийн хамт Улаанбаатар хотод ноос, ноолуур, арьс шир боловсруулах чиглэлээр үйл ажиллагаа явуулж буй мэргэжлийн холбоо, бизнес эрхлэгчдийн үйл ажиллагаатай танилцав. 

Монголын ноос ноолуурын холбоотой танилцах үеэр тус холбооны дэд тэргүүн Г.Ёндонсамбуу, Гүйцэтгэх Захирал Д.Алтанцэцэг нар Италийн талтай хөгжүүлж буй хамтын ажиллагааны талаар танилцуулж, салбарт тулгарч буй сорилт, бэрхшээлийн талаар мэдээлэл хийв.

Сайд Д.Цогтбаатар ноос, ноолуур боловсруулах салбарт дэлхийд тэргүүлэгч Итали улстай хөгжүүлж буй хамтын ажиллагааг өргөжүүлэх, бараа бүтээгдэхүүний чанарыг сайжруулах, өрсөлдөх чадварыг дээшлүүлэхэд бүхий л талын дэмжлэг үзүүлэхээ илэрхийлэв. 

Мөн Дэлхийд алдартай бараа бүтээгдэхүүн үйлдвэрлэгч Италийн компаниудтай холбоо тогтоож, менежментийг нь нэвтрүүлсэнээр түүхий эдийг Италийн дэвшилтэт технологитой хослуулсан олон улс, Европийн стандартад нийцэхүйц хамтарсан бараа бүтээгдэхүүн үйлдвэрлэн гадаад зах зээлд нийлүүлэх боломжийг ашиглахад туслалцаа үзүүлэхээ илэрхийлэв. 

Түүнчлэн хэрэгжүүлэхээр бэлэн болсон төсөл, хөтөлбөрийг санхүүжүүлэх тохиромжтой схемийг тодорхойлох, харилцан ашигтай нөхцлөөр зээл авахад зохих дэмжлэг үзүүлэхээ мэдээлэв. Сайн Д.Цогтбаатар дотоодын бараа бүтээгдэхүүнийг гадаад амжилттай экспортлох, ашигтай гадаад худалдаа хийхэд төр, хувийн хэвшлийн хамтын ажиллагаа чухлыг онцлоод цаашид ойр дотно ажиллахаа мэдэгджээ. 

Элчин сайд Дэ Фелип нэг удаа тоног төхөөрөмж худалдах, худалдан авах богино хугацааны хамтын ажиллагаанаас илүү тогтвортой, харилцан итгэлцэл дээр суурилсан урт хугацааны хамтын ажиллагааг бий болгох зорилтыг тавьж буйгаа мэдээлээд уулзалтаар яригдсан асуудлуудыг Италийн үйлдвэрлэгчдэд сайтар сурталчилан, холбоо тогтооход дэмжлэг үзүүлэн ажиллахаа илэрхийллээ.

Мөн Монголын ноос, ноолуурын холбоо, Италийн текстилийн тоног төхөөрөмж үйлдвэрлэгчдийн холбоо хооронд амжилттай хөгжиж буй хамтын ажиллагааг үргэлжлүүлэн дэмжихээ онцлов.